काठमाडौँ :  इरानले हर्मुज जलमार्ग प्रयोग गर्ने जहाजबाट शुल्क उठाउने संयन्त्र तयार पारेको छ । इरानले जहाजहरूकाे लागि अनुमति, दर्ता र कार्गो विवरण बुझाउनुपर्ने नयाँ नियम ल्याउने तयारी गरेकाे हाे । यसलाई अमेरिका र इजरायलमाथि दबाब सिर्जना गर्ने इरानको रणनीतिक कदमका रूपमा हेरिएको अलजजिराले जनाएको छ । यसले गर्दा तेल र ग्यास आपूर्तिको प्रमुख मार्ग भएकाले विश्व बजारमा मूल्यवृद्धिको सम्भावना बढेको हाे । विश्वको करिब २० प्रतिशत तेल आपूर्ति यही बाटो भएर जान्छ । कतार, साउदी अरब, युएई, कुवेत, इराकको तेल तथा एलएनजी साेही मार्गबाट निर्यात हुन्छ ।
चीन, भारत, जापान र दक्षिण कोरियाजस्ता एशियाली देशहरू सबै भन्दा बढी प्रभावित हुने देखिन्छ । तेहरानमा युद्धपछि मूल्यवृद्धि अत्यधिक बढेको हाे । बजारमा ग्राहक घटेका र व्यापार ठप्प जस्तै बनेको खबरमा उल्लेख गरिएकाे छ । इरानले युद्धका कारण बन्द गरेको शेयर बजार यहि जेठ ५ गते मंगलबारदेखि फेरि सञ्चालन गर्ने घोषणा गरेको हाे। त्यस्तै, लेबनानमा इजरायल र हिजबुल्लाहबीचको आक्रमण जारी छ । इजरायलले दक्षिणी लेबनानका सय भन्दा बढी ठाउँमा आक्रमण गरेको दावी गरेको हाे । हिजबुल्लाहले पनि उत्तरी इजरायलतर्फ ड्रोन हमला गरेको जनाएको छ । इजरायले लेबनानबीचको युद्धविराम ४५ दिनका लागि थपिए पनि दुवै पक्षबीच एक अर्कामाथिको आक्रमण रोकिएको छैन । राष्ट्रसंघले युद्धविरामको स्वागत गरेको छ ।
पश्चिम एशियामा अहिले बहु आयामिक संकटमा फसेको हाे। इरान–अमेरिका तनाव, गाजामा युद्ध, लेबनानमा आक्रमण र हर्मुज जलमार्गको अस्थिरताले विश्व राजनीति तथा अर्थतन्त्र दुवैलाई प्रभावित पारिरहेको हाे । आगामी दिनमा परिस्थिति झनै संवेदनशील बन्न सक्ने विश्लेषकहरूको चेतावनी छ।- एन्जेसी