काठमाडौँ , तत्कालीन मुख्यसचिव एकनारायण अर्यालले जेनजी आन्दोलनका क्रममा उत्पन्न परिस्थितिको विश्लेषण गर्दै सुरक्षा निकायबाट आन्दोलनले यति ठुलो हिंसात्मक रूप लिने ठोस पूर्वसूचना प्राप्त नभएको बताएका छन्।आन्दोलनको छानबिनका लागि गठित जाँचबुझ आयोगलाई बयान दिँदै उनले भदौ २३ र २४ गतेको घटना, बालुवाटारमा भएको उच्चस्तरीय सुरक्षा बैठक र रवि लामिछानेसँग जोडिएका चर्चाहरूबारे स्पष्टीकरण दिएका छन्।अर्यालका अनुसार भदौ २२ गतेको अनौपचारिक बैठकमा आन्दोलनको सुरक्षात्मक विश्लेषण गरिए पनि सामाजिक सञ्जालहरू (डिस्कोर्ड, रेडिट)मार्फत यति ठुलो स्तरको हिंसा र आगजनी हुने सूचना सुरक्षा निकायहरूले दिन सकेका थिएनन्। भदौ २३ गते राति बालुवाटारमा प्रधानमन्त्रीको अध्यक्षतामा बसेको राष्ट्रिय सुरक्षा परिषद्को ३९औँ बैठकमा समेत परिस्थिति पूर्णतः नियन्त्रण बाहिर जाने आँकलन नगरिएको उनले बताए।