काठमाडौँ । इरानले इजरायलमाथि भीषण मिसाइल हमला गरेको छ। आइतबार बिहानैदेखि मध्य इजरायललाई लक्षित गरी गरिएको आक्रमणमा परेर कम्तीमा १५० जना घाइते भएको इजरायली सेनाले जनाएको छ। आक्रमणका क्रममा ठूला भवनहरूमा क्षति पुगेको छ भने ऊर्जा केन्द्रहरूलाई लक्षित गरी मिसाइल प्रहार गरिएको बताइएको छ। अल जजिराका अनुसार इजरायलका विभिन्न स्थानमा ठूला विस्फोटका आवाज सुनिएका छन्। यो आक्रमण अमेरिका र इजरायलले संयुक्त रूपमा इरानका ऊर्जा तथा तेल खानीहरूमा हमला गरेपछि त्यसको जवाफी कारबाहीका रूपमा भएको बताइएको छ। आक्रमणपछि तेहरानले थप कडा प्रतिक्रिया दिने संकेतसमेत दिएको छ।
इजरायली सेनाका अनुसार इरानको दोस्रो चरणको हमला पनि जारी रहेको छ र मिसाइलहरूलाई आकाशमै निष्क्रिय पार्ने प्रयास भइरहेको छ। घाइतेहरूको संख्या बढ्न सक्ने अनुमान गरिएको छ भने धेरैलाई अस्पतालमा भर्ना गरिएको छ।
यसैबीच, इरानले आफ्ना ऊर्जा र आणविक केन्द्रहरूमा आक्रमण भएमा संयुक्त राज्य अमेरिका तथा उसका समर्थक राष्ट्रका ऊर्जा, पानी र सूचना प्रविधि संरचनामाथि कडा जवाफी हमला गर्ने चेतावनी दिएको छ।